Pu Hnunbawnga leh Pi Chhawnlovi-te fa palina Zasiama hi Kum 1900-ah a piang a. Vaituichhun, Thinsulthliah leh Lungbial leh DamVeng-ahte a chen hnuin, 1920-ah Seling bul Tlangnuamah a lut a. Kum 1923-ah Zachuailovi nen inneiin fapa 2 leh fanu 1 an nei.
Chhungkaw harsatna avangin Lower Primary bak sikul a kal lo. Kum 1914-ah Kristianaah a inpe a. Kum 1933 khan Kohhran Upa atan an nemnghet a.An kohhran Zai Pawl dintu leh hruaitu hlun a ni. Mi invawng fel mi leh mi fimkhur leh duhtui tak, hlim thei reng mi a ni. Hla phuahtu lar tak a ni a; mahse a hla phuah hriat chian fak chu 11 a ni. Chung zinga lar zualte chu:-
1) Leiah a lopiang van Lalbera chu,
2) Thlarau Thianghlim thuro nun nem,
3) Aw khawiah nge Chhandamtu chuan,
4) Varparh arsi Chhandamtu lalna ramah chuan,
5) Thlarau thianghlim mei alh leh chhum dinga hruaitu,
tihte an ni. A hlate hi sak a nuam a; a hla nihphung chu thihna ata nunna, lungngaihna ata lawmna, hlauhna ata muanna, buaina ata chawlhna leh thim ata enga luhna an ni hlawm.
T.B. natna avangin April 3,1953 khan Lili par leh ropuina eng zam velna, Beram No leh tlan sate lenna, van kawtthler leh angel varte nen lam hmuh a chak em em thinah chuan chatuana chawl turin he khawvel hi a chhuahsan ta. Tlangnuam (Selingah) –ah a thlan hi hmuh theihin a la awm.
