Education Department-a a thawh laia thingtlâng khaw kilkhawr bera zirtirtu hming pawh hmaih miah lova hre fai vektu Siamkima hi Lungleng (S)-ah 1938 khan a piang a. A pa chu Rokhuma a ni a; a nu chu Huliani a ni.
Mi taima leh lehkha thiam thei tak a ni a. Kum 1959 khan matric passed-in, 1963-ah BA English; 1968-ah MA (Eng) a zo va. Pachhunga University College-ah Lecturer hna thawkin, 1973-ah Mizoram State Sorkarin Professor title a pe a. Education Department-ah Deputy Director hna leh Higher and Technical Education hna a chelh a. Mizoram Institution of Education-ah pawh Principal hna a chelh tawh bawk a ni.
Mizo zinga Book Review leh Cristism tichhuaktu a ni. Ram fan bu leh Ka Zinna Ram; chhiar tham fe leh hralh hlawh tak ziaktu a nih bakah Essay eng emawzât a ziak. Kristian hmaa Mizoten Rihdila mitthi thlarau kal thina an rinna, Kristian sakhua an rin hnua Jordan lui kai tir a nih tak dan thiam tak leh pawm nahawm takin a ziak a. Mizoram dil lian ber Rihdil Burma rama a awm angin; Palestina rama Jordan lui pawh Mizorama luan luh tirin, Zofate thinlungah lui lian leh sei berah a dah thiam a ni.
‘Literature kan zir chhan hi a phena awm mihring, Hnam rilru leh nunphung hriat fiah nân a ni,’ tia ziaktu Siamkima hi, ni sawm dawn lai thia luakin January 13, 1992 zing dar ruk leh minute sawm khân Rihdil thlawh khűma Jordan lui dai kaiin Zalęnna ramah a thlâwk lűt ta a ni.
