Mizo hnam hla,
'Aw nang kan lal kan Pathian' tih phuahtu, Mizoram leh a mi chengte nun tihhlim kawnga hlaa chawitu Rokunga hi February 20,1914 khan Venghluiah a lo piang a. A pian ni leh State kan neih ni leh thla a inthuhmun hi Mizo Hnam Hla phuahtu ni awm renga piang nia ngaih theih a ni. A nu leh pa Thangluta leh Zaliani hian nau an dam thei lo hle a. He ni taka fa an neih hi an kawmthlang pitar in,
‘hei zet chu in chhungkaw khaidingtu ro a nih hi,’ tiin a hmingah
Rokunga a sa a.
Middle sikul zovin a nu leh pa te hnathawh a pui a. Kum 1931 atangin The Loch Printing Press (Tuna Synod Press)-ah thawkin, chang dang kan lovin dam chhung hnaah a neih a. Kohhranten kaihlek hla an huat em em thlakna turin thalaite tana hla 5 tha tak tak a phuah a. A hlaah hian thu har zep lovin, thinlung khawih taka thu hman a thiam thung.
A hla tam tak thlirin, Mizoram chu Pialral anga tehin, par mawi chitinin a bawm, romei leh chhumte lung tileng tawka an zamna. Ram ngaw hring dup kara zo tui thiang luanna, rimawi ram a nih a tar lang thiam a. A mi chengte pawh Mizo nih thlakhlelhtirin, ram changkang tawhte el tura tan la tura fuihin
Mizo kan ni, kan hmel a tha, Kan tum a sang bawk si tiin. Hnam dangte’n an neih ve loh Tlawmngaihna mite rilrua bo mai lo tura chelh din tumin hlain a au tawk tawk a. Nungchang mawi leh tha, hmasawnna rilru pua Mizote a duhthawhzia tilangin, lei mite hunbi chhiartu, van zawla arsi ngawi rengte pawh khi min fuihtua hmangin -
Chung siar lungmawl mah khian,
Nunna eng nei rawh min lo ti;
Ngawi rengin tawng lovin chet danin,
I eng ve ang u......
a ti thlawt mai a ni.
A hla,
Kan zo tang ram nuam tih phei chu Assam Rifles Band Party kalrem nan hman a ni nghe nghe. ‘Rokunga Lungdawh’ hi Rokunga memrial Society leh Aizawl Developement Authority tangrualin Aizawl City Park-ah an dawh a. Chutah chuan a lim an dintir a. 15th Aug.2008 khan Chief Minister, Chairman, ADA ni bawk, Pu Zoramthangan a hawng a. Rokunga hi Century Poet atan thlan a ni. He ni hian Mizo nih tinuamtu Rokunga tih lehkhabu Rev Lalsawma’n a tlang zarh ani.
Thalaite ngainat zawng leh hnam tana rohlu tam tak min hnutchhiahtu Rokunga hi July 12th 1969 tlai dar 10: 15 khan Lentupui chawi vel chhumina a bawm Zoram nuam leh duhawm pawh hi thlahlel zo lovin, Hlakungpui kal hmasate fin turin a kal ve ta a ni.
