April thla, 1902-a piang R.L. Kamlala hi a pa Lûtzathanga’n lehkha thiam tura a duh avangin a pian tirh-ah pencil a humtir a. A pa duh ang ngeiin a hun laia zirna sang ber Middle English chu 1st Div.-ah kum 1929 khan a passed a. Kawnpui leh Kolasib-ah Middle School zirtirtu hna a thawk a.
Hla phuah lamah a tui a, 1920-1950 thleng khan hla a phuah a. Hla 97 vel a phuah a, chung zingah chuan Kristian hla 61 a awm. Kum 1931-ah a hnenah Isua a inlar a, Keimahah awm reng rawh u, keipawh nangmahniah ka awm reng ang a hnena a tih avangin, a hna atanga bangin Chanchin Tha a hril a. A awm dan a danglam deuh avangin police-ten an man a, lung lung inah a tang hial a. Harsatna eng pawh tawk se Philipi 4:4 - a ‘Lawm fo rawh u’ tih changah hian a innghat tlat a, a lungawi thei zel a ni. Hreawmna te, buaina te, lungngaihnate tawk thin mah ila, a hla te hian hmachhuan leh beisei tha zawk min neih tir a. Lusun fate a hnem a, rilru dam takin vanram a ngaihtuahtir thei a. Pathiana lawmna thar neiten a hla-
Misual ka ni Lalpa min ngaidam rawh.
Thupha ka rawn chawi e, i ke bulah;
tih hi mittui tla chungin an sa bang thei lo. Chu chauh chu a ni lo va, fapa tlan bo nia inhre lo pawhin -
Kei, misual a tilungngai leh timualphotu.
Ka tana hmun a phal chuanin;
He khawvel par ka hmelma hi ka ngai lovang,
A vul lai ni a tawi lua e....
tia a hla an han sak meuh chuan Pathian thatzia a hmuhtir thin.
May 25, 1965 khan Lungngaihna rama rumna zawng hi, a Lalpa hmaa lawmna hlaa a channa tur Chatuan ramah a lut ta a ni. Hreawmna leh lungngaihna ram atanga beiseina enga vanram min thlirtirtu hi, mite thinlungah a boral lo vang.
