Chak hmingthang, 6ft leh 9inches-a sang Pu Tumpanga leh Liansiamite’n kum 1907-a fapa Kanhmuna an hrin chu Ralngama tiin a hming an sa a. Ralngama hi kum 1916-ah Kristianah a inpe a. Kum 1923-a Zoram pum Lower Primary exam-ah pakhatna a ni. Kun 1936-1937 khan Tirhkohhna a zir a. Zirpui a neihloh avangin Pu Mena’n Khawkawnah zirtirtu hna thawk se a tih angin zitirtuah a tang a. Khawdungseiah a insawn a. Kum1925-1935 thleng Khawchhiar hna a thawk. Kum 1956-ah Kohhran Upa atan nem ngheh a ni.
Mi tlawmngai leh huaisen, mi taima tak a nih avangin khawtlang leh kohhran khaidingtu a ni a. Fanu pali leh fapa pasarih a nei. Hla 50 a phuah a; Kristian Hla Bu-ah hian pahnih – “Lal pian hun lawmawm tak kan thleng leh ta” tih leh “An ruat Lal Imanuela” tihte seng luh a ni. Krismas leh Kum thar lenkhawm leh Khawhar inah a hlate hian hmun an luah tha hle. A hla nung reng pangate chu:-
1) Lal pian hun lawmawm tak kan thleng leh ta,
2) An ruat Lal Imanuela.
3) Aw, an vul lai mual a liam ta.
4) Adama thlah sual thihna thim hnuaiah hian.
5) Lunngaih tah leh buaina ramah hian.
tihte hi an ni. Kei pawh ka dam lai ni a ral hun chuan. Lalna ram mawi ka chang ve ang ti a, rinna mita thlirtu, Ralngama hi 25th October 1981 khan Beram No hliam hnu zaia awi tur leh; Lawmna par Lalnunnema bel turin a muhil ta a ni. Khawdungsei thlanmualah vui liamin, a awmna lei in chu thiat ni mahse, hmangaih kal tate nen Beram No hliam hnu zaiin an awi ta a ni.
