Zoram mawizia faka, Zofate tan Zoram tluka thlakhlelh tur a awmloh zia hlaa chawitu Liandala hi 1901 khan Lungrang khua ah alo piang a; a pa chu Dophunga Pachuau a ni a, a nu chu Vanhnuaithangi a ni.
Thiltlang khua ah seilian in zirna lam a tui em em a, an khua ah Sikul a awm veloh avangin Sande Sikul atangin a inzir ve thin a ni. Sap Upa leh Pu Buanga te hnenah lehkha a zir thin a, Sap Upa phei chuan a ngaina hle. Damdawi siam dante zirtirin a Bangla ah a awmpui chawt thin.
1915 khan Lower Primary a zo a, 1919 ah Middle a zo leh a ni. Pawl ruk a pass hlim hian Sap Upa in zir leh zel turin a ti a, mahse a pa te a ngaihtuah avangin vawi thum zet a hnial fithla a ni. Zir zel erawh chu a chak em em thung. 1922 atangin zirtir hna a thawk tan a, Khuanghlum Primary School ah a thawk a ni.
Khuanghlum ah hian rei vaklo a awm a, Serkawn sikul ah a thawk chhunzawm a, chumi hnuah Darzo Middle School ah Headmaster in 1945-1963 thleng khan a awm leh a, 1964-1970 chhungin Lunglei Govt. High School ah pension thlengin a thawk a ni. Zirna ngaisang mi anih avang hian a pension hnu 1975 atangin Zohnuai Middle School ah Headmaster in a thawk zui leh ta a, a thih ni thlengin he hna hia chelh a ni. Indopui II na lai khan Lushai Corp ah Commander te pawh a ni ve zar zar a ni.
Pa invawng fel, thianghlim, fai ngaina zet, taima leh nun ngil a ni. Pa tawng tamlo tak, tawng aia thawh uar mi, inthununna feltak ngaina mi a ni. A sikul bangte hi kut ruakin a haw ve mai ngai lova, lung a pu haw fo thin a ni.
Khawtlang thatna ngaihtuah a theihtawp chhuah mi a ni a; infiamna lama Zohnuai khawtlangin hma an sawn theih nan NO MAWI (Cup) a lei a, 1979 atang khan Volley Ball in an inel thin. Tun thleng hian ‘Pu Liandala Memorial Volley Ball Trophy’ tiin kum tin an la inchuh thin a ni.
Fanau malsawmna a dawng viau a, fapa 5 leh fanu 4 a nei a, sawrkar leh kohhran a a kipui chelhtute an awm nawk a ni.
1935 a Kanghmun a a awm laiin King George VI-na Silver Jubilee lawmna hla a phuah a, a hla phuah hmasak pawl a ni awm e. Hla phuah lamah chuan Serkawn a a awm lai hi a vanglai a ni a. Hetih lai hian 1932-’46 inkar khan kumtin favang khaw thengthawt laiin Serkawn School Concert an nei thin a; zai leh rimawi tum rik te, lemchan leh thu leh hla te an uar em em a ni. He Concert hi zofate tan thu leh hla a hmasawnna pawimawh tak a ni.
Liandala pawh hian hemi atan hian hla a phuah hnem hle. Hla te hi ama duhthu ngeia a phuah chu ni bawk mahse miin an ngen avanga a phuah tak engemaw zat a awm a ni. Hla 23 a phuah a, a lehlin te nen phei chuan 100 aia tam mah kutchhuak a nei a ni.
Zoram mawizia hian a lung a len hle a, a hla atangte hian Zoram bak khawvel hmun dang rilru ah a lang thei lo. Changkhat chauh nei hla ZORAM NUAM tih hi han chhiar ve teh –
Zoram nuam dawh cham chungah
Turni lo chhuak sensiar a
Tlang tin, mual tin kai chiai e,
Rangka dar tui iang ngei e,
Raltiang sirva lunglawm te,
Par thing ningzu dawn zain,
An awi ning lo zai nemte’n,
Zo awi lelthang kiu mawi nen,
Kawlah virthli sawm vein,
Hringmi hraichawi leng zawng te,
Zai ve u khawtlang awiin,
Kan lenna Zoram nuam.,
tih mai pawh hian Zofate lung chu a tiawi a ni. Hei hian kan lunglen a kaitho zo lo anih pawhin ZORAM PANGPAR hi han belchiang ila, pangpar chi tinreng mai mawi taka an lo vul chuk chu mitthla in min hmuhtir a,
Fan changin tlang lian te
Lungleng kan uai par zunleng ah
Chhuahtlang lamtluang zawng leh
Thing tin rihnim parin a bawm.,
han tih chiah chuan lunglen zawng a kaitho chiang e. KAN CHUANNA TLANG tih leh TLAILAM HLA te hian han delh leh chiah phei ila zawng America, Australia, Switzerland tih vel hian rilru a la thei lo reng reng a ni.
Mizo nun hlui leh thawnthu te hlaa mawi taka phuahchhuak thiam a ni a, PI PU CHHUAHTLANG HLUI tih hla phei chuan hmanlai Zokhaw nun a tarlang chiang em em a, kan Culture leh pi pu nun hlui te, kan chenna hmun tlawm tak te pawh chu min hmuh mawi tir a ni. Chhura’n sakei a chhaih chungchang a phuahna CHHURA LENGUI tih chu a mawi zet mai. A kutchhuak te hi ro a tling a, school leh college zirlaiah pawh hman ani hlawm.
Bible-in chakna avanga mihring dam theih chin a sawi thleng a dam a, December 19,1980 khan a thi ta a ni.
A Hla Thenkhatte
1. Zoram pangpar
2. Pi pu chhuahtlang hlui
3. Zoram nuam
4. Kan chuanna tlang
5. Tlai lam hla
6. Chhura lengui
7. Aia upate zahthiamin
8. Khawvar hla
9. Tui buh deng hla
10.Silver Jubilee
11.Hnuchham hla
12.Thing chang hla
13.Chhinlung hla
14.Lunglei High School hla
15.Minu hla
16.Darzo sele
* A fanu Pi Liandingi zawtin a hlate hi ka dil a; mahse Shillong lamah a fapa Rev.P.C.Muanthanga’n a lo kawl daih si a, duh angin ka nei kim thei ta lo a ni. A fate hian a bua siam an tum mek.
