August 26, 1918- ah he khawvel a a hun reilo te chu bul a rawn tan a. A pa chu Rev.Liangkhaia a ni a, a nu chu Ngurchhuani a ni. Kum 5 mi lek a nih hian a nuin a thihsan a; amaherawhchu a pa hian a nu nau Ngurliani chu nupuiah a neih leh tak avangin fahrah chan chang lovin enkawlna tha tak hnuaiah a seilian a ni.
School kal hauh lovin 1928 khan Lower Primary a bei ve a, a titha hle nghe nghe. 1931- ah Middle English a zo leh a; a kum lehah Silchar- ah High School kalin kum hnih emaw lek a awm hman a, Shillong lamah a insawn leh a, kum hnih emaw chauh a awm tihin Calcutta University lamah a tuan ve leh ta thung ani. 1936 khan Matric chu 1st Division-ah a chhuak a. Intermediate Arts (I.A) zirin Gauhati Cotton College-ah a lut a, 1st Year tha taka zovin a phur chhohle a. Nuam a ti tan dawn chauh tihin 1937 kum tawp lam chuan ngawr (T.B) a vei ta hlauh mai a ni. Hetih hun lai hi chuan tihdam theih loh natna, thihpui ngei ngei tura ngaih anih avangin a zirlai chu chawlhsan loh theih a ni lo.
Rilru na tak chungin Aizawl- ah a lo haw a, Durtlang Damdawi In- ah enkawl ani a, Inte an sak sak a, tahchuan Kaphleia nen an awm a. That lam a pan zel avangin Saitual-ah awm dam turin hruai chhoh a ni a, engemaw chen enkawl a nih hnuah thatlam; a pan zel avangin Kum 1941 khan a chak ber thin, Pathian thu zir turin Cherra Theological College chu a pan leh ta a ni.
Rei pawh a awm hmain a natna ngai bawk chuan a tlakbuak leh ta! Robert Hospital, Shillong-ah October 19, 1941 khan kum 23 mi lek niin a thi ta a ni. Jaiwa thlanmual, Shillong-ah phum a ni.
Biakliana thlanlung ah chuan tihian a inziak a,
L.BIAKLIANA
College Student
P. August 1918
Th. October 1941
Hei hi hriatrengna lo chang se,
Lalpa rawngbawl a hrân tum val tha,
Chatuan chawlhna ah a kal ta e,
Sakhming chul lo tur Lalbiakliana.
A pa Rev.Liangkhaia
Sakhming chul lotur tih hi a dik takzet mai. He thlanlung a thuziak phuah anih lai hian eng rilru in nge aw an phuah ang? A chhung leh khat, laina hnaite thinlungah chuan a chul hauh lo ang tih chu chiang sa ania, chu chu nge an chawi chhan; a hun laia natna tihbaiawm tak veia khawngaihthlaktaka awm chu Medical History- ah thil danglam tak anih avangin hriatrenga hlawh ang tihna nge ni ang a, thu leh hla, a kutchhuakte avang hian a hming hia reh lovang an tihna? Engpawh chu a chhan ni sela, heng chhan pathum kan sawite avang hian a hming chu a chul hauh lo ang .
Biakliana hi mi tumruh, zaidam, nungchang mawi, chezia a mi hneh thei tak, mi thunun thei zet, mite ngainat leh zah em em, an nel viau lawi si a ni. Saitual a a awm lai hian khawtlang siamthat lam leh thalaite kawng tha kawhhmuh a, mi tak tak, hmantlak annih theihnatura chher a tum nasa hle. A hmei a paa thalaite hruai tha thei tur pawl Boy’s Scout, Rover Scout, Wolf Club, Blue Bird leh Girl’s Guide te a dinchhuak a, Saitual ah mai ni lovin Mizoram ah Blue Bird (Bul Bul) leh Girl’s Guide dinchhuaktu a ni. Saitual a tlawmngai pawl tangkai leh tha zet mai THALAI PAWL tih chu Biakliana hova an din a ni a, a hlawhtling hle a ni,. Tuna YMA kan tih ang hi a ni ber mai. Thalai pawl tha tak a din avang hian Saitual ah chuan 1980 hnu lamah YMA chu a ding chauh a ni awm e.
Biakliana hi thawnthu sawi thiam tak mai a ni a, mi inchhiarzau a ni bawk a, mite’n a thawnthu sawi ngaihthlak nuam an ti thin hle. Thawnthu sawi thiam thenkhat chu ziak lam thiam hauh lo, an sawi han ngaihthlak chuan ziak chhuahtir a, vawnthat atana itawm fe fe te a awm thin; mahse han ziahtir tak tak chuan laktlak der loh te a ni leh si. Biakliana hi chu thawnthu sawi a thiam ang bawkin a ziak thiam a, chu chu a kutchhuak thawnthu pahnih HAWILOPARI leh LALI kan chhiar chuan a chiang hle a ni.
1936 khan Gauhati Cotton College-a I.A a zirlai hian HAWILOPARI tih thawnthu a ziak a, chu chu Mizo Novel kan neih hmasakber a lo ni ta. Chumi hnu Kum 1937-ah LALI (Lalawmpuii) a ziak leh a, chu chu Mizo Novel pahnihna niin Short Story hmasaber a ni bawk.
HAWILOPARI thawnthu hi a ruangam a hniam lo hle. Unau khawngaihthlak tak, fahrah rethei tak nun, harsatna hrang hrangin a phuar vel, vai lian in harsatna belhchhah a, chutih kara chhanchhuaktu lo lang ta chanchin a ni a, a ngaihnawm hle. A hunlai tarlan nilo mahse vai lenlai vela thil thleng angin a ziak a, Mizo history-a innghat , thawnthu tha tak a ni. Historical Novel an tih ang chi hi a ni.
LALI thawnthu ah hian Biakliana chuan Mizo hmeichhe dinhmun tarlang pahin Kristian Sakhaw zirtirna hrulah Love Story ngaihnawm tak a duangchhuak a. Pastor fapa, Pathian Thu zir chak em em mai a ni bawk a, Kristian sakhaw hmehbela thawnthu a phuah pawh hi a inhmeh hlea ni. LALI thawnthu hian kum 1939-’40 vela Mizo Zirlai Pawl (MZP)- in a buatsaih, “Mizo Hmeichhe Chan” tih intihsiak ah lawmman pakhatna a dawng nghe nghe a ni.
Kan Novel hmasa pahnihte hi a nep lo hle ani. Famkim lohna lai chu awm bawk mahse thawnthu ruangam tha tak, mihring zia tarlang tha em em, tawngkam tluangtlam leh harsa awm lo, fiahfai tak, ngaihnawm hle si, Kum 54 emaw vel lai kalta a Mizo tlangval naupang tak, a thih pawh a kum 23 emaw chauhin a lo ziak thei hi fak tlak a ni a, chawimawi a phu a ni.
Mizo zinga novel ziak hmasa ber anih bakah thawnthu tha min lo ziaksak avang hian MIZO THAWNTHU PA (Father of Mizo Novel) tia vuah hial te pawh mi’n an chak a, hnialtu an awm em dawn em ni?
“Inte-thawveng”-a Kaphleia nen an awm laiin Chhura Chanchinbu an chhuah thin a; CHEMTATRAWTA CHANCHIN pawh a ziak bawk. A kutchhuak thenkhatte chu hmuh hleih theih loh a ni ta, a pawi hle. Mizo thawnthu phuah kawnga hma min hruaisaktu BIAKLIANA chu a pa Rev.Liangkhaia tih ang ngeiin ‘Sakhming chul lo tur L.Biakliana’ a ni reng dawn a ni.
A KUTCHHUAKTE
A Thawnthu phuahte
1. Hawilopari
2. Lali
Thawnthu phuah mai bakah hian hlate pawh a phuah nual awm e. Inneih hla lar tak, Kristian Hla Bu No.517-na,
Chung khuanu leng ruat sain, Inneihna a lo awm………
tih hi Sankey hla thluk hawhin a thu hi a phuah a ni a, inneih nikhua chuan kan sak rim hle hi a ni. Lehlin pawh a nei nual bawk. Thenkhat chauh :
1. Lungngaihni a awm thin
2. Chhandamtu’n kawng tluanin min hruai
3. Zotui thiangte, luang dem dem la.
