Hnuna leh Aimawii fa Lalzova hi December 2,1924 khan Lunglei Rahsi Venga lo piang a. Indopui II-na lo chhuah khan Pawl nga a zo hman chiah a. Lemziah leh thil lem siam lama a talent thatzia hriain, SDO Wiscott-an Aizawlah a hruai phei a. Aizawl atang chuan C.Thuamluaia’n lehkha zir turin Calcutta-ah a hruai a. Sikul luhna tur an hriat lawk loh avang leh a lung lân em avangin Mizoramah a lo chuang chhuak leh a. Lehkha zir chu a bansan ta a.
Kum 1943-1945 chhungin hla 48 vel a phuah a. Sakhaw lam hla 3 leh hla lenglawng 5-te bak chu a hlate chu love song ang chi vek hi a ni.
Rimawi a ngainain heng Spanish quiter, Hawaii guiter, violin, ukelele-te hi a tum thiam vek a. Mi lungleng thei mi nih nak alaiin, a bialnu’n pasal a neihsan a. Chumi avang chuan
‘Khawnge i kal dawn sawi rawh parte ka zui ang che’ tih hla a phuah phah a. A hlate hi 1960 hma lam kha chuan Zoram tluanah tlangvalte’n se dar tia zet tingtang awrhin, zan thla engah mimal leh a huhovin an sa uar hle. Zan thla engah nulaten luhkapuiah la an kai a; an bulah an inleng tlangval-ten Lalzova hla an han thlawh meuh chuan a hre pha nu leh pate’n an vanglai ni dawn kirin mutmu an tuah hlei thei lo a ni ber e.
Kum 1945 December 2-a a piancham vawi 21na a lawm hnu December 8, 1945-ah khawsikpui avangin a boral a. Lungleng hmingthanga sawi a nih avangin Fam Lalzova tia sawi thin a ni.
Hla siamtu pakhat pawhin-
Hmana pi pute’n an sawi Lalzova,
Suihlung lęngin a fam an ti;
Kei ang em hian a leng bikin ka ring lo,
a ti ani.
