Pu Hrangchina leh Pi Kapkungite fapa Laltanpuia hi kum 1915 khan Sialsuk khuaah a piang a. A tlangval lai chuan tlangval pian tha tak, tawng tam vak lo a ni. Pa inngaitlawm tak a nih avangin, a hla phuah chungchang zawh pawh a, cho chhuah harsa fu a ni. Lehkha chhiar taima tak a nih avangin eng thu pawh sawipui theiha hriatna nei zau, kut temthiam lamah pawh duailo tak a ni. Kum 1944-ah Rotluangi nen an innei a, fapa pathum an hring.
Kum 1934 atanga hla phuahin, hla 36 a phuah. A hla atanga thlirin amah hi mi lungleng thei tak a ni tih a hriat a. A hla avanga amah ngainatu, pathlawi rual leh nula rual zai thamten kum 1960 khan, Awmhar Champion pawl an din a. Chu pawl member chu fiamthu thawh thiam an ni hlawm. An Pawl Doctrine chu Thuhnuairawlh a ni. A hla zinga lar zualte chu:-
1) Zatlang lawiang thang tur hi,
2) Aw! Sialkhawpui ka pianna hmun,
3) Awmhar saisen nau ang tah ka bang dawn lo,
4) Aw Zoram, aw kan Zoram,
5) Tin kim ka dawn changin lunglen zaten a tho leh thin,
tihte an ni. Mipui thinlunga Lungrualna hi Ram leh Hnam tan Himna Kulhpui ber a lo ni, tih phuhtu Laltanpuia hi 8th April,1997 khan lei hringnun kalsanin a muhil a. April 8,1997 khan Suialsuk thlanmualah vui liam a ni.
