Mitdel ni chunga mit vârte aia Pathian hmu fiahtu Laithangpuia hi kum 1885 khan Sesawngah a piang a. Mit del sa-a piang zawng a ni bik lo; he khawvel eng hi kum ruk zawng a hmu ve a ni.
Kum 6 a nihin a nu leh pa ten Tuirini-ah an hruai a. Lung nal rap palhin a tlu a; a mit a sawh chhia a. Kum 1911-ah Sihphirah pemin, he khuah hian Kristianah a inpe a. Sihphir atang chuan Sesawnga-ah an pem let leh a. Kum 1919-ah Salvation Army-ah a inpe.
A tleirawl chhuah tirh atanga zai ngaina mi a ni a. Lal leh Upate’n zu hmun sa hmunah khuang bengtu berah an hmang thin a. Chung hunlai chuan khawvel lam hla pawh a phuah nual a. Chhandamna Sipai Pawl a zawm hnu hian Pathian lam hla 27 a phuah a. A hla han thlir hian hla phuahtu dangte aia a danglamna chu mitdel mah nise, khawvel hrehawmna leh ama mangannate, lungngaihnate awmna ram lam hawi zawngin hla a phu-ah miah lo hi a ni. Ngaihbel tur ting chuan tawngkam pakhat – Ka taksa lungngai riang thlawn’ tih hmun khatah a awm ve.
“Hun bik nei hla kan nei ngei tur a ni” tiin, inneih hla, inlawmna hla, kum hlui thlah hla, nau hla, kum thar lawmna, inthlahna, biak in thar lawmna, zuk leh hmuam dona, jubilee hla leh thlai thar hlanna hlate a phuah nual.
Mitdel ni si, fiah taka Pathian hmutu; Kristian hla tha tak tak min siamsaktu Laithangpuia hi December 3,1937 khan Thingsât khuaah a thi a.
Beram No Lal lęna tlang ka thlirin,
Lawmna chuan min hmuak a;
Thihna Jordan ka kai hunah chuan,
Van ruai ropui ka kil dawn,
tih hla kan sak chhung chuan, he hla phuahtu Laithangpuia hi kan zingah a nung reng ang.
