Venghlui tlangvâlte tâna an veng nulate nihna –
Phuloh leng hlir an ni zaia ka chawi hi,
Nêmte’n an leng dêl hluikhua an mawi;
Nêmte’n lungrual zate’n an lêng hmuh hian,
Hluikhaw vâlrual zawng thinlai an hnêm.
tia phuahtu K.C.Lalvunga,Zikpuii Pa tia a thu ziaka dah thintu hi Decmber 27, 1929-ah Venghlui-ah a piang a. A pa chu Hrawva a niin, a nu chu Lalluli a ni.
Amah hi hla phuah thiam, essay ziak leh thawnthu phuah thiam a ni. Government High School, Shillong-a thawk chungin zanah College a kal a. Kum 1953-ah BA a passed a. Sub Inspector of Schools hna rei deuh a thawh hnuin GM.High School, Champhai leh Saitual High School-ah Headmaster hna a thawk a. Champhai High School-a a thawh lai hian Champhai bial MDC atan thlan a ni.
Kum 1962-ah IFS zawmin khawvel hmun hrang hrangah Ambassador hna a thawk a. A thawhna apiangah kohhran belin, Santigo, Canberra, India leh Khatmandu-a a awm laiin Kohhran Upa-a thlan a ni.
Foreign-a a awm laipawhin Zofatetan lehkha a ziak thin a. Kross bulah chuan, Silverthangi, Hotel Awmtu, No27 CC Coy-te ziakin, amah ngeiin Ka Masterpiece (Ka kutchhuak) a tih Nunna Kawng Thuampuiah tih a ziah chuan mite thinlung a den dan a thuk hle. Tleirawl laia nula rinawm, ram buai laia a duh lo chung vai neih luihtirin, a pasalin nawhchizuar enkawltu a leitir a....Mizo a nihna pawh pho chhuak ngam lovin; loh theih loh thil avang bawka nawhchizuar chu, Mizo tlangval, nawhchizuar hma pawha inhambuai ve mai mai lovin a chhan chhuak a. An khua ngeia him taka hruaia nupui atan a neih tak dan chuan KC Lalvunga a tilar mai ni lovin, Mizo tlangvalte Krista sipai rinawm tak ni turin tan a laktir a ni ber e.
Thu leh hla lama rohlu min hnutchhiahtu KC Lalvunga hi a boral hnuin, Mizo Academy of Letters Award 1993-1995 MAL-in a pe a. Amah hi awm tawh lo mahse, rohlu min hnutchhiahte chu chatuan a nung tur a ni thung.
