Chalchhingpuia leh Chuailovi fa Kâphleia hi kum 1910 January ni 10 khan Thiak khuaah a piang a. Sialsûkah Primary sikul zovin, Aizawlah Middle sikul a zo leh a. High School Shillong – ah zirin, kum 1935-ah Scottish Church College, Culcutta-ah IA a zir a. Natna khirh tak TB (Ngawr) a vei avangin a dam hlei thei lo va. 17 September 1937 khan Synod Hospital Durtlangah dah luh a ni a. A lehkha zirpui Biakliana nen TB an vei avangin, in tê tak te sak sak-in, chu inah chuan an cheng a. Anmahni chuan an in chu
In tê thaw-Veng hming an puttir nain mite tlawhpawh loh in a nih avangin Rûn Khawhar a ni mah zâwk âwm e.
Chu in tê tak têah chuan a hmangaih Zoramah hian thawh tur a tam zia a hmu a, tih theih a neih tlem zia pawh a hai lo. Zoram Hmasawnna turin thahnem a ngai a. Zoram chu hma lam pana ram tha lehzual a nih theihna turin hma lâkna kawng hrang hrang rawt chhuakin, Essay ngaihnawm tak THLIRTU a vawrh chhuak a. Historical Novel ‘Chhingpuii’chu kum 1938 khan a ziak a. Biakliana nên kârtin chanchin bu an ziak a. Tang tlangin Chhura Chanchin pawh an ziak bawk. A Essay leh Novel ziahte hian belh chian an dâwl em em a. Thu ziak mi mai ni lovin hla pawh a phuah thiam a. Thu leh hla lama thangtharte tana sul sutu leh thawh hlawktu Kaphleia hi November 13,1940-ah a thi a. Zoramin a lunghlu a chan hma lua ti ila kan daw em em lo ang chu.
Amah ngeiin –Kan dam rei leh rei lohte hi kum te, thlate hian a lo hril lova, kan thu leh hla, kan thil tihin a hril ber zawk a ni, a tih angin, a dam lai ni tawi hle mah se, a thu ziakte avangin Mizote thinlungah Kaphleia hi a nung reng a ni.
