Mizoram Catholic Kohhran dintu Peter Thangphunga leh Pi Saichhungin January 9, 1925-a fapa an neih chu a hmingah Laldailova an sa a. Baptisma a chanin a Kristian hmingah Joseph Frances phuahin J.F.Laldailova tih a ni hlen ta a.
Kum sawm mi lek a nihin kum 1935 khan Chittagong-ah High School a lût a. Mizo dang awm ve lo mah se naupang tumruh mi a nih avangin chhel takin a zir a. Tum 22 exam a beihah tum 17 pakhatna a ni. English Literature-a a tui avangin Mizo tawng hloh vek khawpin a zir a. Indopui II-naah sikul khar a nih avangin pawl 8 thleng chauh a zir a. Mizo rama a lo kir lehin Mizo tawng a hranpain a zir leh a. Mizo tawng pawh ani tluka duhtui leh thiam an awm lo ang tih khawp hiala thiam a ni leh ta mai a.
Mizorama a lo chhuah hian an chhungkua an harsa hle a. Chutih lai chuan Boys’ M.E.School-ah 93rd Brigade an inkulh a. Peon hna thawktu tur an duh tih hriain a pa nen an va dil a. Major-in a saptawng thiam zia a hriatin, “Sap ramah hetiang hi tirhchhiahah kan hmang ngai lo, lehkha zirtir leh zawk rawh u,” a ti a. Mahse an inchhungin a tlin miau si loh avangin a chhun zawm thei ta chuang lo va.
Royal Ar Force a zawm a. Rimawi a ngainat avangin tawtawrawt ham a zir a, a thiam hle. Band Master a ni pha. Lenkhawm hian a lung a tileng thei em em a; Chheih zai leh Tlanglam zaite pawh a thiamin a ngaina a ni.
Lehkhabu lehlin lamah ei zawngin, Thu ngaihnawm bu leh Chanchin bu a enkawl a. Bible lehlina a famkim lo lai leh duhthusam lo laite huaisen takin a sawisel thin. Mizo-English Dictionary leh English-Mizo Dctionary a siam a. Tun thlengin zirlaite tan a tangkai em em a ni. Mizo zawng zawng English min zirtirtu ber a ni.
October 1978 khan hrisel lohna a neih tak avangin Dibrugarh leh Silchar-ah te a inentir a. Dibrugarh damdawi in atangin dam tha ang reng takin March 12,1979 khan a lo hawng a. Mahse rei vak lo hnuah Civil Hospital-ah thla khat zet a awm a. May 24,1979-ah beidawng takin mahni in lamah a hawng a. June 7,1979 zing dar ruk-ah William Shakespeare-a tawng kulmut pui pui pawh Zotawng nalh taka Zofate lehlin saktu, zirlaite Dictionary-a chawmtu chuan he khawvel hi a chhuahsan ta a ni. Amah awm tawh lo mahse a lehkhabu rotling a awm chhung chuan Pu JF-a tih hi a ri reng ang.
