Kum 1909 khan Khawbung khua Pu Laikunga leh Pi Thanghnuni te nupa chuan fapa an hring a. Chawngtleng lal nula, Khawbung lal Lalbika nupui, Pi Lalzami chuan chu nau chu Lallianchhunga tiin a hming a sa a. Naupang hrisello leh bawrhsawm tak a nih avangin a awmtu chuan ‘
Damtea a nih hi’ tiin ‘Damte, Damte’ tiin awih mut nan tak a hmang a. Chuti taka a pi Tuahkhawlin a dam a hauh takah chuan Damhauhva tiin a hming lem (nick-name) atan a lo pu hlen ta. A thih thlengin Damhauhva tih a ni hlen ta a ni.
Damhauhva hi lei hringnun bêl chianga ngaihtuahtu a nih avangin, lengzêm, chhâwlchhaih leh hla lênglâwng lam thleng phuah thei turin Pathianin talent a pe in hla 51 a phuah a. Hla phuah thiam a nih bakah kut themthiam tak leh mahni ngaihtuahna hmanga hmanraw chher thleng in a thiam a. Lem ziak leh khabe sêp thiam tak a ni bawk.
Pa titi thiam a ni a, German ral run chanchin midang sawi a hriat a duh tawk a a han sawi chuan a kalte pawhin amen an lo pe thlap thlap thin. Mizote nunzia hlaa tah lutin Rih lipui te, lelte kiu te, thal leh favang pawh mite mitthlatir theitu a ni.
Naupang bawrhsawm tak ni mah se, a dam an hauh tlat avangin Bible-in mihring dam chen a sawi rahbi pakhat chuang kai phâkin a dam a. Suangtuahna leh ngaihtuahna thûk tak nei mi a nih avangin, leilunga tawih ral mai tura a insuangtuahin a lungawi lo a ni ang –
Hnutiang hmatiang ka dawn changin,
Dârtui ang ka luang ral tur hi ;
Lung a awi love...
a ti thlawt mai a ni.
Hun rei tak khum beta a damloh hnuin April 20, 1970-khan ama in, Khawbungah a lei taksa chu dârtui anga luangral tura hnutchhiahin Lalpa hnên a pansan ta a ni.
